नांदेड : वृत्तसंस्था
पती-पत्नीचे नाते हे नेहमीच प्रेमाचे असते. पण गेल्या काही वर्षापासून अनेक नात्यामध्ये छोट्या मोठ्या भांडणावरून मोठे वाद होत असतात. अशीच एक धक्कादायक घटना नांदेड शहरात घडली आहे. शहरातील आमदारनगर भागात गुत्तेदारी करण्यासाठी माहेरहून पैसे आणण्याच्या मागणीसाठी विवाहितेचा छळ करण्यात आला.
या त्रासाला कंटाळून विवाहितेने घरातच साडीने गळफास घेऊन आत्महत्या केली. डॉक्टरांनी पत्नीला मृत घोषित करताच पतीने रुग्णालयाच्या शेजारीच असलेल्या एका इमारतीच्या तिसऱ्या मजल्यावरून उडी घेतली. या घटनेत पतीला गंभीर स्वरुपाची दुखापत झाली आहे. शिवराणी ऊर्फ शिवानी अरुण देवपुजे असे मयत महिलेचे नाव आहे. तर त्यांचे पती अरुण देवपुजे हे गुत्तेदारी करतात. पैशांसाठी छळ केल्याच्या या प्रकरणात मयत महिलेच्या सासरच्या मंडळींवर भाग्यनगर पोलिस ठाण्यात गुन्हा नोंदविण्यात आला आहे.
