धुळे : वृत्तसंस्था
धुळे जिल्ह्यातील एका गावात शेतात मेंढ्या सोडल्याचा जाब विचारणाऱ्या सेवानिवृत्त शिक्षकाला शिवीगाळ करत मारहाण करण्यात आली. ही घटना बुधवारी घडली असून याप्रकरणी निजामपूर पोलिस ठाण्यात गुरुवारी चार जणांविरोधात गुन्हा दाखल झाला आहे. सुभाष सुकदेव सोनवणे (वय ६०, रा. भामेर ता. साक्री) असे निवृत्त शिक्षकाचे नाव आहे.
मिळालेल्या माहितीनुसार, भामेर शिवारात सोनवणे यांचे शेत आहे. त्यांच्या शेतात मेंढपाळांनी मेंढ्या चरण्यासाठी सोडल्या होत्या. मेंढ्या सोडू नका, बाजरीचे नुकसान होत आहे असे सोनवणे यांनी मेंढपाळांना सांगितले. त्यावेळी त्यांच्यात वाद झाला. शिवीगाळ करत मारहाण करण्यात आली. यात ते जखमी झाले त्यानंतर चौघा मेंढपाळांनी घटनास्थळावरून पळ काढला. गंभीर जखमी झालेल्या सुभाष सोनवणे यांना रुग्णालयात दाखल करण्यात आले उपचारानंतर निजामपूर पोलिस ठाण्यात फिर्याद दाखल केली.
