नरडाणा : वृत्तसंस्था
पुण्याकडून गोरखपूरकडे (उत्तर प्रदेश) जाणारी खासगी बस नरडाणा गावाजवळील जुन्या टोलनाक्याजवळ शुक्रवारी सकाळी उलटली. या अपघातात १५ ते २० प्रवासी जखमी झाले. सुदैवाने जीवितहानी टळली.
मिळालेल्या माहितीनुसार, युपी ५५ एटी १८३३ क्रमांकाची खासगी बस प्रवासी घेऊन पुण्याहून उत्तर प्रदेश राज्यातील गोरखपूर येथे जात होती. शुक्रवारी सकाळी ८:०० ते ८:३० वाजेच्या सुमारास नरडाणा गावाजवळील जुन्या टोलनाक्याजवळ चालकाचे नियंत्रण सुटल्याने भरधाव वेगाने जात असलेली बस उलटली. त्यात १५ ते २० प्रवाशांना किरकोळ स्वरुपाची दुखापत झाली. काहींना मुका मार लागला. यात बसचे मोठ्या प्रमाणावर नुकसान झाले आहे. अपघाताची माहिती मिळताच ग्रामस्थांसह नरडाणा पोलिसांनी घटनास्थळी धाव घेतली. जखमी प्रवाशांना बाहेर काढण्यात आले. प्राथमिक आरोग्य केंद्रात किरकोळ जखमी रुग्णांवर प्राथमिक उपचार करण्यात आले. अपघाताची नोंद नरडाणा पोलिस ठाण्यात करण्यात आली आहे.
