पुणे :वृत्तसंस्था
अनेक तरुण-तरुणी कुठल्या ना कुठल्या कारणाने आत्महत्या करीत असल्याचे अनेक घटना राज्यात घडत असतान एक धक्कादायक घटना पुण्यातून समोर आली आहे. २५ वर्षीय तरुणी पोलीस भरतीची तयारी करीत असतांना तिने राहत्या घरात गळफास घेऊन आत्महत्या केल्याची घटना उघडकीस आली आहे. सोनाली धनाजी धुमाळ (वय-25 रा. टिळेकर मळा, उरुळी कांचन, ता. हवेली) असे आत्महत्या केलेल्या तरुणीचे नाव आहे. याबाबत लोणी काळभोर पोलीस ठाण्यात अकस्मात मृत्यूची नोंद करण्यात आली आहे.
पोलिसांनी दिलेल्या माहितीनुसार, सोनाली धुमाळ ही विवाहित असून तिचा घटस्फोट झाला आहे. ती उरुळी कांचन परिसरात माहेरी राहत होती. मागील एक वर्षापासून ती पोलीस भरतीची तयारी करीत होती. आई-वडील बाहेर गेल्यानंतर सोनाली हिने राहत्या घरात ओढणीच्या सहाय्याने गळफास घेऊन आत्महत्या केली. घटनेची माहिती मिळताच लोणी काळभोर पोलिसांनी घटनास्थळी धाव घेतली. सोनाली हिने कोणत्या कारणामुळे आत्महत्या केली हे समजू शकले नाही. पुढील तपास पोलीस करीत आहेत.
