भुसावळ : प्रतिनिधी
मोबाइलवर रिचार्ज करण्यासाठी तीनशे रुपये दिले. अनेक दिवस होऊनही रिचार्ज न झाल्याने पैसे परत मागितल्याचा राग आल्याने एकास बेदम मारहाण केली. तसेच मानेवर व हातावर ब्लेडने वार करून जखमी केले. ही घटना रविवारी घडली. याप्रकरणी बाजारपेठ पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, शिवाजीनगर येथील मुस्तकीम शेख मुख्तार (वय २४) आगाखान वाडा यांना कुमार किराणासमोर फरहान शेख नसीम व फरदीन शेख नसीम हे दोन्ही भाऊ भेटले. मुस्तकीम यांनी २ ऑक्टोबरला मोबाइलमध्ये ३०० रुपये रिचार्ज मारण्यासाठी रोख पैसे दिले होते. मोबाइलमध्ये रिचार्ज न आल्यामुळे मुस्तकीमने फरदीन यांना याबाबत विचारणा केली असता रिचार्ज केलेला आहे. परंतु कुठेतरी तांत्रिक अडचण आली असेल असे त्याने सांगितले, माझे रिचार्ज काही झालेला नाही, तू ३०० रुपये परत दे, असे मुस्तकीनने म्हटल्याचा राग आल्याने त्यास शिवीगाळ करून चापटा बुक्क्यांनी बेदम मारहाण केली. फरहान शेख याने पाकिटातील ब्लेड काढून मुस्तकीमच्या मानेवर डाव्या बाजूला तसेच उजव्या हातावर वार करून जखमी केले. तसेच जिवे ठार मारण्याची धमकी दिली.
