जळगाव : प्रतिनिधी
जळगाव जिल्ह्यात गेल्या काही दिवसापासून अल्पवयीन मुलासह मुलीमध्ये गळफास घेवून आत्महत्या करण्याचे प्रमाण मोठ्या प्रमाणात वाढत आहे. दि. ४ रोजी शहरातील एका परिसरातील १६ वर्षीय मुलीने गळफास घेवून आत्महत्या करण्याचा प्रयत्न केला होता. पण सुदैवाने परिवाराला समजताच तिला रुग्णालयात दाखल केले होते या मुलीने मृत्यूशी ४ दिवस झुंज दिल्यानंतर दुर्देवाने तिचा अखेर मृत्यू झाला आहे.
मिळालेल्या माहितीनुसार, जळगाव शहरातील समता नगरात राहणाऱ्या सोळा वर्षीय दिया संदीप बनसोडे या अल्पवयीन मुलीने दि. ४ ऑक्टोंबर रोजी राहत्या घरात गळफास घेवून आत्महत्या करण्याचा प्रयत्न केला होता. ही घटना तिच्या कुटुंबियांच्या लक्षात येताच त्यांनी मुलीला लागलीच खासगी रुग्णालयात दाखल केले. याठिकाणी तिच्यावर अतिदक्षता विभागात उपचार सुरु असतांना सोमवार दि. ९ रोजी सकाळी पावणेनऊ वाजेच्या सुमारास तिची प्राणज्योत मालवली. तरुणीच्या आत्महत्येचे कारण अस्पष्ट असून याप्रकरणी रामानंद नगर पोलीस ठाण्यात अकस्मात मृत्यूची नोंद करण्यात आली आहे.
