रावेर : प्रतिनिधी
रावेर तालुक्यातील केऱ्हाळे बुद्रुक या गावात आई-वडिलांनी विभक्त होऊन स्वतंत्र वेगवेगळा संसार थाटून वाऱ्यावर सोडलेल्या नंदिनी दीपक महाजन (वय १५) या ९ वी त शिक्षण घेणाऱ्या विद्यार्थिनीने आजीच्या घरात गळफास लावून आत्महत्या केली. केन्हाळे बुद्रुक येथे ही घटना घडली.
मिळालेल्या माहितीनुसार, जन्मदात्री मातेच्या घरी (माहेरी) ही घटना घडली. आजी भाजीपाला विक्री व्यवसाय करुन या नातीचा सांभाळ करीत होती. मात्र, ७ ऑक्टोबर रोजी आजी रावेरला गेली असताना घरी कोणीही नसल्याचे पाहून नंदिनीने घरात गळफास लावून घेतला. तिच्या आत्महत्येचे कारण मात्र गुलदस्त्यात आहे. याप्रकरणी रावेर पोलिसात आकस्मिक मृत्यूची नोंद करण्यात आली आहे. आजी निर्मलाबाई उमाकांत महाजन या रावेरला भाजीपाला विक्रीचा व्यवसाय करून घरी परतल्या असता, ही घटना उघडकीस आली. रावेर पोलिस स्टेशनचे सहायक पोलिस निरीक्षक सिद्धेश्वर आखेगावकर यांच्या मार्गदर्शनाखाली पोलिस उपनिरीक्षक तुषार पाटील पुढील तपास करीत आहे.
