जळगाव : प्रतिनिधी
जळगाव शहरातील एका परिसरात ३५ वर्षीय तरुणाने भाड्याच्या घरात गळफास घेत आपली जीवनयात्रा संपविल्याची घटना उघडकीस आल्याने परिसरात हळहळ व्यक्त केली जात आहे.
मिळालेल्या माहितीनुसार, शहरातील जळगाव – धरणगाव महामार्गावर असलेल्या खोटे नगर परिसरात भाड्याच्या घरात राहणारे बाळासाहेब लोटन पवार (वय ३५) यांनी आज सकाळी रविवारी गळफास घेऊन आत्महत्या केल्याची घटना घडली आहे. पवार हे औद्योगिक वसाहतमधील एका कंपनीत कामाला असून त्यांच्या आई-वडिलांचे चार ते पाच वर्षांपूर्वीच निधन झाले आहे. तर तीन बहिणींचे लग्न झाले असून तरुण खोटेनगरात भाड्याच्या घरात एकटाच राहत होता. रविवार, ८ ऑक्टोबर रोजी दुपार झाली तरी तो घराबाहेर आला नाही, त्यामुळे घरमालक त्याला पहायला गेले असता त्यांना हा तरुण गळफास घेतलेल्या अवस्थेत दिसून आला. त्या वेळी त्यांनी तालुका पोलिस ठाण्यात माहिती दिली. त्यानुसार पोलिस घटनास्थळी दाखल झाले. त्यांनी नागरिकांच्या मदतीने तरुणाला खाली उतरवून शासकीय वैद्यकीय महाविद्यालय व रुग्णालयात नेले. तेथे डॉक्टरांनी मयत घोषित केले. या तरुणाने शनिवारी रात्रीच गळफास घेतला असावा, असा अंदाज वर्तविला जात आहे.
