नवी दिल्ली : वृत्तसंस्था
फिजिक्सवाला अॅपवर ऑनलाइन वर्ग सुरू असताना एका विद्यार्थ्याने शिक्षकाला चक्क चपलेने मारहाण केली. या घटनेशी संबंधित नऊ सेकंदाचा व्हिडिओ सोशल मीडियावर तुफान व्हायरल होत आहे.
व्हिडिओत दिसते की, शिक्षक विद्यार्थ्यांचे प्रश्न फळ्यावर सोडवत आहे. अचानक एक विद्यार्थी त्याच्या जागेवरून उठतो व हातात चप्पल घेऊन शिक्षकाला मारहाण करू लागतो. विद्यार्थी शिक्षकाला दोनदा चप्पल मारतो. शिक्षक बचावासाठी मागे हटतो. विद्यार्थ्याच्या हातातून चप्पल निसटून जमिनीवर पडते. शिक्षक व विद्यार्थी दोघेही फिजिक्सवालाच्या गणवेशात दिसत आहेत. तथापि, विद्यार्थ्याने शिक्षकावर हल्ला का केला? हे अद्याप समजू शकलेले नाही. फिजिक्सवालाकडूनही याबाबत प्रतिक्रिया आलेली नाही.
