जळगाव : प्रतिनिधी
जळगाव शहरातील रामानंद नगर पोलिस ठाण्याच्या हद्दीतील एका भागात राहणाऱ्या युवकाने त्याच परिसरात राहणाऱ्या तरुणीच्या घरात घुसून तिचा विनयभंग केला. हा प्रकार गुरुवार, ५ ऑक्टोबर रोजी पहाटे 3 वाजेच्या सुमारास घडला. याप्रकरणी रामानंद नगर पोलिस ठाण्यात एकाविरुद्ध गुन्हा दाखल करण्यात आला आहे.
मिळालेल्या माहितीनुसार, रामानंद नगर पोलिस ठाण्याच्या हद्दीतील एका भागात २२ वर्षीय तरुणी मावशी व आजीसोबत राहते. ती मावशी व आजी यांच्यासोबत घरात झोपलेली असताना गुरुवारी मध्यरात्री ३ वाजेच्या सुमारास त्यांच्याच घराच्या परिसरात राहणारा तरुण घरात घुसला. त्याने तरुणीचा विनयभंग केला. त्यावेळी तिची मावशी व आजी झोपेतून जाग्या झाल्याने त्यांना पाहून तरुण पसार झाला. याप्रकरणी तरुणीने रामानंद नगर पोलिस ठाण्यात फिर्याद दिली. त्यावरून तरुणाविरुद्ध गुन्हा दाखल करण्यात आला आहे. पुढील तपास पोहेकॉ नीलेश पाटील करीत आहेत.
