नवी दिल्ली : वृत्तसंस्था
उत्तर प्रदेशच्या ज्योती मौर्य प्रकरणाशी साधर्म्य असलेली घटना झारखंडच्या गोड्डा जिल्ह्यात घडली. पिझ्झा डिलिव्हरी बॉय टिंकू यादव याने पत्नी प्रियाला नर्सिंगचा कोर्स करता यावा, यासाठी अडीच लाखांचे कर्ज काढले. परंतु नर्स होताच पत्नी प्रियकरासह पळून गेली आणि दिल्लीत जाऊन लग्नही केले. लग्नाचे फोटो पत्नीने सोशल मीडियावर टाकल्यानंतर टिंकूला याबाबत कळाले. टिंकूने आता पत्नी व तिच्या प्रियकराविरुद्ध पोलिसांत तक्रार दाखल केली आहे.
२०२० मध्ये टिंकू आणि प्रिया कुमारीचे लग्न झाले. लग्नानंतर पत्नीने पुढे शिक्षणाची इच्छा व्यक्त केली आणि नर्सिंग कोर्स करायचा असल्याचे सांगितले. ती अभ्यासूही होती, त्यामुळे टिंकूने आर्थिक परिस्थिती नसतानाही २.५ लाखांचे कर्ज काढून पत्नीला शकुंतला नर्सिंग कॉलेजमध्ये प्रवेश घेऊन दिला. पण, याच दरम्यान ती दिलखुश राऊतच्या प्रेमात पडली आणि कोर्स पूर्ण होताच त्याच्यासोबत पळून गेली, असे टिंकूने सांगितले. आम्ही या प्रकरणाचा तपास करत असून चौकशीनंतर कारवाई करण्याचे आश्वासन पोलिसांनी दिले आहे
