भुसावळ : प्रतिनिधी
शहरातील आझाद नगरातील नाजीश शेख नासीर (वय ३१) या जीम ट्रेनरची उधारीचे पैसे मागितल्याच्या वादातून दोघांनी हत्या केल्याची घटना रविवारी सकाळच्या सुमारास केशव नगरात घडली होती. याप्रकरणी तिघा संशयितांना पोलिसांनी अटक केली. असून त्यांना अतिरिक्त सत्र न्यायालयाने तीन दिवसांची पोलीस कोठडी सुनावली आहे.
भुसावळ शहरातील खडका रोड परीसरातील आझाद नगरात नाजीश शेख नासीर या तरुणाने नात्याने मामी असलेल्या सुलतानाबी मुबारक खान (स्वामी विवेकानंद शाळेजवळ, केशव नगर, भुसावळ) यांना मुलीच्या लग्नासाठी साडेतीन लाख रुपये दिले होते. पैसे परत मागितल्यानंतर सुलतानाबी यांचा नाजीशसोबत शनिवारी रात्री ११ वाजता जोरदार वाद झाला होता. या वादात महिलेच्या भावासह भाच्याने उडी घेत नाजीशला धमकी दिली होती. त्यानंतर रविवारी सकाळी सहा वाजता नाजीश शेख नासीर हा स्वामी विवेकानंद स्कूलजवळील माहीर फिटनेस नामक जीम उघडण्यासाठी जात असताना संशयित सुलतानाबी हिच्या घराजवळ दबा धरून असलेल्या संशयित ईझहार उर्फ अज्जू जलालोद्दीन शेख (आझाद नगर, भुसावळ) व भाचा आसीफ दाऊद शेख (आझाद नगर, भुसावळ) यांनी तलवारीसह चाकूचे सपासप वार करीत तरुणाची हत्या केली होती. त्यांना मंगळवारी पोलिसांनी अटक केली.
