भुसावळ : प्रतिनिधी
भुसावळ शहरात गेल्या काही दिवसाआधीच सराईत गुन्हेगार निखील राजपूत याच्या खुनाची घटना ताजी असतांना आज देखील शहरात पूर्व वैमनस्यातून एका ३१ वर्षीय तरुणावर धारदार शस्त्राने हल्ला चढवीत खून झाल्याची घटना आज सकाळी उघडकीस आली आहे.
मिळालेल्या माहितीनुसार, भुसावळ शहरातील खडका रोड परिसरात पूर्व वैमनस्यातून नाजीर शेख नशीर (वय ३१) या तरुणावर धारदार शस्त्राने हल्ला करण्यात आला. या हल्ल्यात त्याच्या छातीसह हातावर खोलवर वार झाले. परिसरातील नागरिकांनी धाव घेऊन त्याला तात्काळ जळगाव येथे जिल्हा रुग्णालयात दाखल केले. येथे वैद्यकीय अधिकारी डॉ. सचिन पाटील यांनी त्याला मृत घोषीत केले. मयत नाजीर शेख नाशिर याच्या नातेवाईकांनी जिल्हा रूग्णालयाच्या परिसरात काळीज पिळवटून काढणारा शोक व्यक्त केला. याप्रकरणी बाजारपेठ पोलीस स्थानकात गुन्हा नोंदविण्याचे काम सुरू होते.
