जळगाव : प्रतिनिधी
जळगाव शहरातील मेहरूण येथील २५ वर्षीय तरुणाचा झालेल्या अपघातात मृत्यू झाल्याची दुर्देवी घटना जळगाव तालुक्यातील एका गावात घडली आहे. वावडदा येथील रामदेववाडी जवळ गुरुवारी २८ रोजी संध्याकाळी ७ वाजेच्या सुमारास एका दुचाकींचा भीषण अपघात झाल्याने दुचाकीवरील दोघे गंभीर जखमी झाले होते. त्यातील २५ वर्षीय तरुणाचा क्रवारी दुपारी १ वाजता उपचारादरम्यान खाजगी रुग्णालयात मृत्यू झाला आहे.
मिळालेल्या माहितीनुसार, शहरातील मेहरूण परिसरातील राम मंदिर येथील रहिवासी निलेश गोकुळ पाटील (वय २५) व महेश रविंद्र खोरपडे (वय ३०) हे दोघे वावडदा येथून गुरुवारी २८ रोजी संध्याकाळी ६. ३० वाजेला जळगावात परतत होते. रामदेववाडीजवळ त्यांच्या वाहनाचा भीषण अपघात झाला. यावेळी नागरिकांनी व नातेवाईकांनी निलेशला खाजगी रुग्णालयात तर महेश खोरपडे याला वैद्यकीय महाविद्यालय व रुग्णालयात उपचारार्थ दाखल केले. खाजगी रुग्णालयात उपचार सुरु असताना शुक्रवारी २९ रोजी दुपारी १ वाजेच्या सुमारास निलेशचा उपचारादरम्यान मृत्यू झाला. यामुळे कुटुंबीयांनी एकच आक्रोश केला. तर महेश खोरपडे याच्यावर शासकीय रुग्णालयात उपचार सुरु आहेत. निलेश पाटील याचे पश्चात वडील, १ भाऊ, विवाहित बहीण असा परिवार आहे.
