भुसावळ : प्रतिनिधी
राष्ट्रीय महामार्गावरील जैन लाल मंदिरासमोर चार चाकी व दुचाकीचा समोरासमोर अपघात झाला. यात दुचाकीस्वार ठार तर मागे बसलेला जखमी झाला आहे. त्यांच्यावर गोदावरी रुग्णालयात उपचार सुरू आहेत. ही घटना शुक्रवारी सकाळी पावणे बारा वाजेच्या सुमारास घडली. मृताचे नाव फारुख खान युसुफ खान (वय २७ रा. फातेमानगर, मलकापूर) असे आहे. एनगाव (ता. बोदवड) येथील श्रीकृष्ण छगन पारधी चारचाकीने परिवारासह जळगावला आले होते.
मिळालेल्या माहितीनुसार, भुसावळकडून वरणगावकडे जात असताना महामार्गावर दुचाकीने क्रमांक (एम एच २८ यू ९३२३) समोरून धडक दिली. यात दुचाकीस्वार फारुख खान युसूफ खान जागीच ठार झाला. मागे बसलेला राजू प्रताप साळुंखे हा जखमी झाला. त्यांना गोदावरी रुग्णालयात दाखल केले आहे. याबाबत श्रीकृष्ण पारधी यांनी दिलेल्या तक्रारीवरून बाजारपेठ पोलिसात गुन्हा दाखल केला आहे. तपास हवालदार रवींद्र सपकाळे तपास करीत आहेत.
