मुंबई : वृत्तसंस्था
धावत्या टॅक्सीत १४ वर्षांच्या गतिमंद मुलीवर लैंगिक अत्याचार झाल्याची धक्कादायक घटना समोर आली आहे. अत्याचारानंतर नराधमांनी त्या मुलीला मालवणी भागात सोडले. याप्रकरणी सलमान शेख (२६) आणि टॅक्सीचालक प्रकाश पांडे (२८) यांना अटक केली आहे.
पीडित मुलीने दिलेल्या जबाबानुसार, घरात झालेल्या चेष्टा मस्करीच्या रागातून मुलीने रात्रीतून घर सोडले. मालवणीत राहणाऱ्या चुलत बहिणीच्या घरी ती निघाली. दक्षिण मुंबईत तिच्या घराजवळून सोमवारी मध्यरात्री अडीचच्या सुमारास ती प्रकाश पांडेच्या टॅक्सीतून निघाली. पांडे तिला दादरला घेऊन गेला आणि तिथे सलमान शेख हा लॉजमालक टॅक्सीत बसला. सलमानने तिच्यावर टॅक्सीत लैंगिक अत्याचार केला. त्यानंतर मुलीला मालवणी भागात सोडले. ही तरुणी परिसरात फिरत होती. पोलिसांची नजर तिच्यावर पडताच तिला ताब्यात घेत चौकशी केली. काही गैरप्रकार आढळून आल्याचा संशय येताच मुलीला पोलिस ठाण्यात घेऊन गेले. दुसरीकडे मुलगी गायब झाल्याने कुटुंबीयांनी पोलिसात तक्रार दिली.
