जळगाव : प्रतिनिधी
जळगाव शहरात बेकायदेशीरित्या गावठी हातभट्टीची दारू विक्री करण्यासह वेगवेगळे सात गंभीर गुन्हे दाखल असलेल्या गणेश उर्फ नाना गंगाराम कोळी (३७, रा. पिंप्राळा, जळगाव) याच्यावर रामानंद नगर पोलिसांनी एमपीडीए कायद्यांतर्गत कारवाई करीत त्याची ठाणे कारागृहात रवानगी केली.
मिळालेल्या माहितीनुसार, रामानंद नगर पोलिस हद्दीत बेकायदेशीरित्या गावठी हातभट्टीची दारू विक्री करणारा गणेश कोळी त्यांच्यावर रामानंद नगर पोलिस ठाण्यात गंभीर स्वरूपाचे वेगवेगळे सात गुन्हे दाखल आहेत. तरीदेखील त्याच्यात कोणतीही सुधारणा न झाल्याने रामानंद नगर पोलिस ठाण्याच्या पोलिस निरीक्षक शिल्पा पाटील यांनी कोळी याच्यावर एमपीडीएची कारवाईचा प्रस्ताव जिल्हा पोलिस अधीक्षक एम. राजकुमार यांच्याकडे पाठविला होता. त्यानुसार त्याला स्थानबध्द केले.
