महानगरपालिकेची १७ रोजी मुदत संपतेय..!
जळगाव : येथील जळगाव शहर महानगरपालिकेची १७ रोजी मुदत संपत आहे. सार्वत्रिक निवडणूक लगेच घेणे शक्य नसल्याने राज्य शासनाच्या नगरविकास विभागातर्फे महानगरपालिकेच्या आयुक्तांची प्रशासक म्हणून शुक्रवारी दि. १५ सप्टेंबर रोजी आदेशाद्वारे नियुक्त केली आहे. त्यामुळे आता मनपाचे आयुक्त विद्या गायकवाड यांच्याकडे प्रशासक म्हणून पदभार आलेला आहे.
जळगाव महापालिकेची मुदत १७ सप्टेंबर रोजी संपत आहे. त्या पार्श्वभूमीवर राज्य निवडणूक आयोगाने मुदत संपत असलेल्या स्थानिक स्वराज्य संस्थांच्या सार्वत्रिक निवडणूका विहीत वेळेत घेणे शक्य होणार नसल्याचे तसेच संबंधित नागरी स्थानिक संस्थांची मुदत संपताच तेथे प्रशासकांची नियुक्ती करण्याबाबत कळविले आहे. कायद्यातील तरतुदीनुसार पालिकेची मुदत ही पहिल्या बैठकीपासून जास्तीत जास्त पाच वर्षांची असल्यामुळे सदर मुदत पुढे सुरू ठेवता येणार नाही, असे आदेशात म्हटले आहे.
त्यामुळे महाराष्ट्र महानगरपालिका अधिनियमातील तरतुदीनुसार दि.१७ सप्टेंबर रोजी मुदत संपत असलेल्या जळगांव महानगरपालिका येथे प्रशासक पदावर आयुक्त डॉ. विद्या गायकवाड यांची जळगाव महानगरपालिका यांची नियुक्ती करण्यात आली आहे. महाराष्ट्राचे राज्यपाल यांच्या आदेशानुसार व नावाने शासनाच्या उप सचिव प्रियांका कुलकर्णी- छापवाले यांनी हे आदेश पारित केले आहे.
