यवतमाळ : वृत्तसंस्था
केंद्र सरकारच्या पर्यटन मंत्रालयाकडून विविध योजना राबविल्या जातात. या योजनांमध्ये गुंतवणूक केल्यास भरभक्कम असा परतावा मिळतो, असे आमिष दाखवून यवतमाळातील तब्बल नऊ जणांना गंडविण्यात आले. या ठगबाजाला आर्थिक गुन्हे शाखेने नागपूर पोलिसांकडून ताब्यात घेतले. पोलिस कोठडीत असलेल्या ठगबाजाचे अनेक कारनामे पुढे येऊ लागले आहेत. त्याने मैत्रिणीवर चक्क ५२ लाख रुपये उडविले. ताज हॉटेल लखनऊ, रेडिसन ब्ल्यू हॉटेल नागपूर येथेही लाखोंच्या पाठ्य त्याने केल्याची कबुली दिली.
अनिरुद्ध आनंदकुमार होशिंग (३०, रा. वाराणसी, उत्तर प्रदेश) असे या ठगबाजाचे नाव आहे. त्याने यवतमाळातील नऊ जणांना विविध प्रकारचे आमिष दाखवून गंडविले. यात त्याला यवतमाळातील महादेवनगर येथे राहणाऱ्या मीरा फडणीस यांनी सहकार्य केले. नागपूर पोलिसांनी होशिंग याला शिताफीने अटक केली त्यानंतर यवतमाळ आर्थिक गुन्हे शाखेने होशिंग याला प्रोड्युस वॉरंटवर ताब्यात घेतले. सलग दहा दिवस पोलिस कोठडीत असलेल्या होशिंगकडून ठगविलेल्या रकमेचे काय केले याचे मजेदार कारनामे पुढे येऊ लागले आहेत. त्याची साथीदार मीरा फडणीस हिला न्यायालयाने तात्पुरता जामीन दिला आहे. हा जामीन रद्द करावा, यासाठी पोलिसांकडून न्यायालयात बाजू मांडली जाणार आहे.
मीरा फडणीस हिला ठगबाज होशिंग याने महागड्या भेटवस्तू दिल्या. यात डायमंड नेकलेस सेट, सोने-चांदीचे ताट, वाटी, सोन्याची चेन, मोबाइल, दुचाकी अशा वस्तू मीरा फडणीस व तिची मुलगी शर्वरी हिला भेट दिल्याचे सांगण्यात आले. त्यानंतर पोलिसांनी या वस्तू जप्त केल्या.
