अमळनेर : प्रतिनिधी
अमळनेर तालुक्यातील डांगर या गावी सर्पदंश झालेल्या एका दहा वर्षीय बालकाला दोन ठिकाणी वेळीच उपचार न मिळाल्याने त्याचा मृत्यू झाल्याची घटना मंगळवारी घडली. त्याला सुरुवातीला जानवे येथे प्राथमिक आरोग्य केंद्रात त्यानंतर अमळनेर येथे ग्रामीण रुग्णालयात नेले होते. परंतु, तेथेही त्याच्यावर तात्पुरते उपचार करण्यात आले. नंतर त्याला गंभीर अवस्थेत धुळे जिल्हा रुग्णालयात नेले असता उपचारादरम्यान त्याचा मृत्यू झाला. आकाश राजेंद्र भिल असे या मृत बालकाचे नाव आहे.
आकाश याला जिल्हा परिषदेच्या शाळेत जाताना त्याला सर्पदंश झाला. दरम्यान, सर्पदंश होताच आकाशच्या मित्रांनी आरडाओरड केली. बालकाच्या काकांनी गावातील काही लोकांकडून दुचाकीची व्यवस्था करुन आकाश याला जानवे येथे प्राथमिक आरोग्य केंद्रात उपचारासाठी नेले. परंतु गंभीर असल्याने त्याला अमळनेर येथे ग्रामीण रुग्णालयात पाठवण्यात आले. ग्रामीण रुग्णालयात देखील त्याच्यावर तात्पुरते उपचार करून त्याला धुळे जिल्हा रुग्णालयात पाठवण्यात आले. तेथे गेल्यावर काही वेळात उपचार घेताना त्याचा मृत्यू झाला.
