लाईव्ह महाराष्ट्र न्यूज: शहरातील हनुमान नगर परिसरातून बुलेट चोरी करणा-या दोघा चोरट्यांच्या मुसक्या आवळण्यात एमआयडीसी पोलिस स्टेशनच्या गुन्हे शोध पथकाला यश आले आहे.
याबाबत सविस्तर माहिती अशी की,
14 नोव्हेंबर रोजी शहरातील हनुमान नगर परिसरातून राजेंद्र नवल पाटील यांच्या मालकीची बुलेट चोरीला गेली होती. त्यानंतर 16 नोव्हेंबर रोजी याप्रकरणी एमआयडीसी पोलीस ठाण्यात तक्रार दाखल करण्यात आली होती. सदर बुलेट चोरीचा गुन्हा दाखल झाल्यानंतर पोलीस निरीक्षक प्रताप शिकारे यांच्या मार्गदर्शनाखाली सहायक फौजदार आनंदसिंग पाटील, गणेश शिरसाळे, मिलिंद सोनवणे, रामकृष्ण पाटील, रमेश चौधरी, किशोर पाटील, सचिन पाटील, योगेश बारी यांनी शुभम उर्फ कोयता शेखर पाटील (19) रा. पंढरपूर नगर गोदावरी कॉलेज जवळ जळगाव, ऋतिक राजेंद्र काकडे (20) रा.इंदिरा नगर खेडी या दोघांना खेडी येथून रात्री ताब्यात घेतले.दोघांनी हा चोरीचा गुन्हा केल्याचे कबूल केले आहे. यातील शुभम याच्याविरुद्ध एमआयडीसी पोलीस स्टेशनला खुनाचा आणि शस्त्र अधिनियम विरोधात गुन्हा दाखल आहे. तसेच भुसावळ शहर पोलिस स्टेशनला शस्त्र अधिनियम विरोधात आणि चोरीचा गुन्हा दाखल आहे. न्यायालयात हजर करण्यात आले असता न्यायालयाने दोघांना एक दिवसाची पोलिस कोठडी सुनावली आहे.
