जळगाव : प्रतिनिधी
जळगाव शहरातील अपघाताची मालिका नियमित सुरु असून पुन्हा एकदा जळगाव शहरात अपघात झाला आहे. शहरात दुधाचे कॅरेट उतरविल्यानंतर दूधवाटप करण्यासाठी निघालेल्या वाहनाचे अॅक्सिलेटर अडकल्याने अनियंत्रित झालेल्या या वाहनाने समोरून येणाऱ्या दुचाकीला धडक दिली. यात दुचाकीस्वार महिला पूजा वासुदेव तलरेजा (वय ४८) या गंभीर जखमी झाल्या असून, त्यांच्यावर खासगी रुग्णालयात उपचार सुरू आहेत. ही घटना मंगळवारी सायंकाळी मासूमवाडीतील डायमंड हॉलजवळ घडली.
मिळालेल्या माहितीनुसार, शहरातील सिंधी कॉलनीतील पूजा तलरेजा या दुचाकीवरून मासूमवाडीकडे जात होत्या, तर महामार्गावरून दुधाचे वाहन (एमएच ०५ आर ७५८०) दूधवाटप करून तुकारामवाडीकडे जात होते. एका दुकानावर दुधाचे कॅरेट उतरविल्यानंतर चालक वाहन घेऊन पुढे जात होता. यावेळी वाहनाचे अॅक्सिलेटर लॉक झाले. यामुळे वेगाने हे वाहन समोरून येत असलेल्या पूजा तलरेजा यांच्या दुचाकीला धडकले. ही धडक इतकी जोरात होती की, महिला रस्त्यावर फेकली गेली, त्यांची दुचाकी आणि दुधाचे वाहन रस्त्याच्या कडेला असलेल्या गटारीत उलटले. त्याआधी त्याने रस्त्यावर उभ्या इतर वाहनांनाही धडक दिली. गंभीर जखमी झालेल्या तलरेजा यांना खासगी रुग्णालयात दाखल करण्यात आले आहे. घटनेची माहिती मिळताच एमआयडीसी पोलिस ठाण्याचे कर्मचारी योगेश बारी व गोविंदा पाटील यांनी घटनास्थळी धाव घेत अपघातग्रस्त वाहन ताब्यात घेतले. याप्रकरणी रात्री उशिरापर्यंत पोलिसात नोंद नव्हती.
