मुंबई : वृत्तसंस्था
श्रावण महिन्याच्या पहिल्या सोमवारी अनेक भावीक महादेव मंदिरात दर्शन घेण्यासाठी जात आहेत. वसईतील तुंगारेश्वर येथे महादेवाचे दर्शन घेण्यासाठी येतात. पण दर्शनाला आलेल्या एका महिलेसोबत हृदयद्रावक घटना घडल्याचे उघडकीस आले आहे. हि घटना वसईत घडली आहे. पतीसोबत बुलेटवर बसून तुंगारेश्वर दर्शनाला गेलेल्या पत्नीचा ओढणीने घात केला. बुलेटवरुन जात असताना महिलेची ओढणी बुलेटच्या मागच्या चाकात अडकल्याने गळफास बसून तिचा मृत्यू झाल्याची धक्क्दायक घटना घडली. मुंबई अहमदाबाद महामार्गावर वसई बाफाणे हद्दीत ही घटना घडली. प्रतिमा यादव असे मयत महिलेचे नाव असून, ती कांदिवलीतील रहिवासी आहे. या घटनेमुळे कांदिवली परिसरात हळहळ व्यक्त होत आहे.
कांदिवलीतील रहिवासी असलेले यादव पती-पत्नी रविवारी सुट्टी असल्याने वसईतील तुंगारेश्वर मंदिरात महादेवाचे दर्शन घेण्यासाठी गेले होते. रविवारी पहाटे महादेवाचे दर्शन घेऊन पती-पत्नी बुलेटवरुन कांदिवली येथे घरी परतत होते. कांदिवली पश्चिमेतील ईराणीवाडी येथे यादव दाम्पत्य राहते. मुंबई-अहमदाबाद महामार्गावर वसई बाफाणे हद्दीत महिलेच्या गळ्यातील ओढणी बुलेटच्या मागच्या चाकात अडकली. ओढणी चाकात अडकल्यानंतर चाकात गुंडाळत गेली. यामुळे प्रतिमा हिच्या गळ्याला फास बसून ती खाली पडली. तिच्या डोक्याला गंभीर दुखापत झाली. तिला तात्काळ रुग्णालयात नेण्यात आले, मात्र डॉक्टरांनी तिला मृत घोषित केले. या घटनेमुळे यादव कुटुंबावर दुःखाचा डोंगर कोसळला आहे.
