अमळनेर : प्रतिनिधी
अमळनेर तालुक्यातील वावडे येथून चारचाकी चोरली आणि त्याच कारने मांडळ गावात येत अज्ञात चोरट्यांनी सात दुकाने फोडून सुमारे ३ लाख रुपयांचा ऐवज लंपास केल्याची घटना दि. १० रोजी रात्री घडली.
मिळालेल्या माहितीनुसार, तालुक्यातील वावडे येथून प्रकाश ज्ञानेश्वर धोबी यांची चारचाकी क्रमांक एमएच १९ एएक्स १७ चोरीला गेल्याचे दि. ११ रोजी सकाळी लक्षात आले. त्यांनी मारवड पोलिसात गुन्हा दाखल केला. त्याच वेळी मांडळ येथे सात दुकाने फोडल्याचे समोर आले. त्यात महेश जैन यांच्या किराणा दुकानातून २५ ते ३० हजार रुपयांचे साहित्य, नीलेश पाटील यांच्या कृषी केंद्रातून लॅपटॉप व रोख रक्कम ३० हजार, वाल्मीक पाटील यांच्या रेशन दुकानातून यांच्या गोदामातून तीन हजार, अमोल सोनार यांच्या दत्तात्रय ज्वेलर्स दुकानातून ४०० ग्रॅम चांदी, १६ ग्राम सोने, दोन हजार रुपये रोख, कमलाकर अहिरराव यांच्या ज्वेलर्समधील सात हजार रुपये रोख, संजय कोळी यांच्या कटलरी दुकानातील साहित्य असा सुमारे पावणेदोन लाखांचा ऐवज चोरट्यांनी चोरून नेल्याचे समजले. या चोरट्यांनी हीच कार वापरली असल्याचे सीसीटीव्ही फुटेजमधून समोर आले आहे. चोरट्यांनी गल्लीतील एका घराला बाहेरून कडीदेखील लावली होती. या चोरीच्या तपासासाठी ठसेतज्ज्ञांना बोलावण्यात आले होते.
