धरणगाव : प्रतिनिधी
धरणगावचे लोकनियुक्त माजी नगराध्यक्ष स्वर्गीय सलीम भाई पटेल यांच्या पुण्यस्मरणानिमित्त आज शहरात विविध विकास कामांचे उद्घाटन करीत त्यांच्या आठवणीना उजाळा देण्यात आला.
लोकनियुक्त नगराध्यक्ष स्वर्गीय सलीम भाई पटेल यांना आपल्यातून जाऊन चार वर्षे पूर्ण झाली. त्यांना श्रद्धांजली म्हणून आज धरणगाव शहरात विविध विकास कामांचे उद्घाटन करण्यात आले. त्याआधी धरणगाव शिवसेना शाखेकडून मुस्लिम कब्रस्तान येथे जाऊन त्यांच्या समाधीला आदरांजली अर्पण करण्यात आली आणि वृक्षारोपण करण्यात आले. कब्रस्तान येथील ईदगाह मैदानात पेव्हर ब्लॉक बसवण्यात येत असून त्या कामाचे उद्घाटन मुस्लिम समाजातील ज्येष्ठ पंचांच्या हातून करण्यात आले. तसेच कुंभारवाडा परिसरात पेव्हर ब्लॉक रस्त्याच्या कामाचे उद्घाटन समाजातील ज्येष्ठ नागरिकांच्या हस्ते करण्यात आले. याप्रसंगी धरणगाव शिवसेनेचे प्रमुख पदाधिकारी आणि शिवसैनिक कार्यकर्ते परिसरातील नागरिक मोठ्या संख्येने उपस्थित होते. विविध विकास कामाच्या माध्यमातून स्वर्गीय सलीम भाईंना त्यांच्या चौथ्या पुण्यस्मरणानिमित्त आदरांजली वाहण्यात आली.
