धुळे : वृत्तसंस्था
जिल्ह्यातील शिरपूर तालुक्यातील सांगवी येथे आदिवासी क्रांती दिनाचे पोस्टर अज्ञात समाजकंटकांनी फाडल्याने गुरुवारी गावात दोन गटात तुफान दगडफेक आणि जाळपोळीचा प्रयत्न झाला. याप्रकरणी १० जणांना अटक करण्यात आली असून गावात संचारबंदी लागू करण्यात आली आहे. सायंकाळपर्यंत १२ जणांना पोलिसांनी याप्रकरणी ताब्यात घेतले आहे.
सांगवीतील जोयदा रस्त्यावरील शाळेजवळ आदिवासी क्रांती दिनाचे पोस्टर फाडल्याचे वृत्त गावात पसरताच शेकडो आदिवासी बांधवांच्या संतप्त जमावाने दुसऱ्या समुदायावर दगडफेक केली. पोस्टर फाडणाऱ्यांना अटक करा, अशी मागणी केली. यातून तणाव वाढून गावात काही ठिकाणी जोरदार दगडफेक सुरू झाली. काही टपऱ्या उलथवून टाकण्यात आल्या, तर काही पेटवण्याचा प्रयत्नही झाला. यासोबतच काही गाड्यांचे काच फोडण्यात आले. मात्र, या वेळी होणारी मोठी दुर्घटना सांगवी पोलिसांनी प्रयत्न करून हाणून पाडली. परिस्थिती हाताबाहेर जात असल्याचे लक्षात येताच धुळे येथून एसआरपी, दंगल नियंत्रण पथक, जादा पोलिस बंदोबस्त तातडीने मागवण्यात आला. यासोबतच सांगवी गावात येणारे सर्व रस्ते बंद करण्यात आले. या दगडफेकीत अनेक जण जखमी झाले आहेत. त्यातील तीन जणांना शिरपूर उपजिल्हा रुग्णालयात उपचारासाठी दाखल करण्यात आले. त्यात लक्ष्मण भील (वय १८), शिवदास आसाराम भील (वय ४०), सुभाष विजय सोनवणे यांना गंभीर मार लागल्याने त्यांना धुळे येथे उपचारासाठी हलवण्यात आले आहे. सांगवी पोलिसांसह शिरपूर, धुळे आणि इतर ठिकाणाहून आलेल्या पोलिस कर्मचाऱ्यांनी अत्यंत संयमाने परिस्थिती हाताळली. या दगडफेकीत अनेक जण जखमी झाले असून, त्यात काही जण गंभीर जखमी झाले.
दोन गटात झालेल्या दंगलीवर नियंत्रण मिळवण्यासाठी जिल्हाभरातील पोलिसांचा फौजफाटा सांगवीत दाखल झाला. दंगलीची पाहणी केल्यानंतर आमदार काशीराम पावरा, पोलिस अधीक्षक संजय बारकुंड, तहसीलदार महेंद्र माळी शांतता प्रस्थापित करण्यासाठी समजावून सांगण्याचा प्रयत्न करीत असताना अचानक एका बाजूने दगडफेक सुरू झाली. दगडफेकीत आमदार काशीराम पावरा आणि तहसीलदार महेंद्र माळी यांच्या गाड्यांच्या काचा फुटल्या.
