नाशिक : वृत्तसंस्था
चार महिन्या आधी तहसिलदारांनी नाशिक येथील आपल्या कार्याचा पदभार घेतल्यानंतर नाशिकचे तहसीलदार नरेश बहिरम यांना तब्बल 15 लाख रुपयांची लाच घेताना रंगेहाथ अटक करण्यात आली होती. यामुळे याची चर्चा सुरू आहे. लाचलुचपत प्रतिबंधक विभागाने ही कारवाई केली. बहिरम यांनी गौण खनिज प्रकरणातील दंडाची रक्कम माफ करण्यासाठी लाचेची मागणी केली होती.
मिळालेल्या माहितीनुसार, नाशिकला तहसीलदार म्हणून नरेश बहिरम यांची नुकतीच 14 एप्रिल 2023 ला नियुक्ती झाली होती. त्यानंतर अवघ्या चार महिन्यांत ते लाचलुचपत प्रतिबंधक विभागाच्या जाळ्यात अडकले आहेत. दरम्यान, नाशिक जिल्ह्यातील राजुर बहुलामध्ये जमिनीच्या एका मालकाला जमिनीमध्ये मुरुम उत्खननाबाबत मूल्य नियमानुसार पाचपट दंड, स्वामित्वधन जागा भाडे मिळून एकूण रक्कम १ कोटी २५ लाख ६ हजार २२० याप्रमाणे दंड देण्याचे आदेश दिले होते.
याबाबत जमिनीच्या मालकाने नाशिकच्या उपविभागीय अधिकाऱ्यांकडे अपील दाखल केले होते. त्याबाबत आदेश होऊन सदरचे प्रकरण पुनश्च फेर चौकशीसाठी नाशिकचे तहसीलदार नरेशकुमार बहिरम यांच्याकडे परत पाठवण्यात आले होते. तक्रारदार तहसीलदार यांच्या भेटीसाठी निरीक्षण वेळी गेले. यावेळी त्यांनी तक्रारदाराकडे तडजोडीअंती 15 लाख रुपये लाचेची मागणी केली. सदरील लाच मागणी केल्याचे पडताळणी पंचनामा वेळी मान्य करून लाच स्वीकारण्याचे तहसीलदारांनी मान्य केले आहे. यामुळे याबाबत तहसीलदार नरेश बहिरम यांच्याविरुद्ध गुन्हा दाखल करण्याचे कामकाज सुरू आहे, अशी माहिती एसीबीकडून देण्यात आली आहे. दरम्यान, या घटनेमुळे याची नाशिक जिल्ह्यात मोठी चर्चा सुरू झाली आहे.
