नवी दिल्ली : वृत्तसंस्था
देशात गेल्या काही महिन्यापासून एका प्रेमस्टोरीची मोठी चर्चा सुरु आहे. आज देखील ती चर्चा कुठेही थांबायचे नाव घेत आहे. ती म्हणजे पाकिस्तानी महिला सीमा हैदर भारतीय प्रेमी सचिनसाठी सीमा ओलांडून आली आहे. ती गुप्तहेर असल्याचा संशय असल्याने तिची चौकशी केली जात आहे. पण सध्या सीमा व सचिन या जोडप्याची आर्थिक स्थिती बिघडली आहे. दोघांना कामासाठी बाहेर पडता येत नसल्याने त्यांच्यावर आर्थिक संकट ओढावलं आहे. अशातच आता सीमाला चित्रपटात काम मिळालं आहे.
‘युपी तक’ने एक व्हिडीओ शेअर केला आहे. त्यासोबत दिलेल्या माहितीनुसार, जानी फायरफॉक्स प्रोडक्शन हाऊसची टीम सीमा हैदरला भेटण्यासाठी तिच्या घरी पोहोचली. यावेळी चित्रपट दिग्दर्शक जयंत सिन्हा आणि भरत सिंह यांनी सीमा हैदरची ऑडिशन घेतली. या चित्रपटात सीमा हैदर भारतीय रॉ एजंटची भूमिका साकारणार आहे. राजस्थान येथील उदयपूरमधील शिंपी कन्हैया लाल साहूच्या हत्येवर एक ‘टेलर मर्डर स्टोरी’ नावाचा चित्रपट बनवला जात आहे. त्या चित्रपटात सीमा महत्त्वाच्या भूमिकेत दिसणार आहे. यावेळी चित्रपट निर्माते अमित जानी यांनी हिंदू धर्म स्वीकारल्याबद्दल सीमाचे भगवी शाल देऊन स्वागत केले, त्यानंतर तिने अमित यांचे चरण स्पर्श करून आशीर्वाद घेतले. सीमा गुप्तहेर असल्याचा संशय असल्याने एटीएसकडून तिची चौकशी केली जात होती. आता सीमा हैदर आणि चित्रपटाची टीम एटीएसच्या अहवालाची वाट पाहत आहे. एटीएसच्या अहवालानंतर सीमा चित्रपटाचे शुटिंग सुरू करेल, असं म्हटलं जात आहे.
दरम्यान, काही दिवसांपूर्वी अमित यांनी त्यांचे फिल्म प्रॉडक्शन हाऊस ‘जानी फायर फॉक्स’ या बॅनरखाली बनणाऱ्या चित्रपटात काम करण्याची ऑफर सीमा व सचिन या जोडप्याला दिली होती. अमित जानी यांनी नुकतेच मुंबईत चित्रपट प्रॉडक्शन हाऊस सुरू केले आहे. हे प्रॉडक्शन हाऊस उदयपूरमधील शिंपीच्या हत्येवर आधारित चित्रपट बनवत आहे.
