जळगाव : प्रतिनिधी
जळगाव इन्स्टाग्राम या सोशल मीडिया साइटवर राष्ट्र पुरुषांबद्दल आक्षेपार्ह पोस्ट केल्याप्रकरणी शिवाजीनगर हुडको भागातील एकाविरुद्ध शहर पोलिस ठाण्यात २ ऑगस्ट रोजी गुन्हा दाखल करण्यात आला.
मिळालेल्या माहितीनुसार. महाविद्यालयीन शिक्षण घेत असलेला व शिवाजी नगर हुडको परिसरातील रहिवासी प्रशिक दीपक ससाने ( वय १८) हा १ ऑगस्ट रोजी त्याच्या मोबाइलमध्ये इन्स्टाग्रामवर रिल्स पाहत असताना एका अकाउंटवरून एक व्हिडीओ शेअर केलेला दिसला. सदर व्हिडीओच्या कमेंट बॉक्समध्ये एका नावाच्या इन्स्टाग्राम आयडीवरून तीन दिवसांपूर्वी अश्लील व आक्षेपार्ह कमेंट केलेली होती. सदर कमेंट ही राष्ट्रपुरुषांविषयी असल्याची खात्री झाल्याने तरुणाने समाज बांधवांना सांगितले. शिवराळ भाषेमुळे समाजाच्या भावना दुखावल्या असून, दोन समाजात जातीय तेढ निर्माण करण्याच्या हेतुनेच सदर पोस्ट केल्याचा उद्देश लक्षात आल्याचे समाजबांधवांचे म्हणणे आहे. सदर इन्स्टाग्राम आयडी संबंधितांनी तपासला असता तो शिवाजीनगर, हुडको भागात राहणाऱ्याचा असल्याचे लक्षात आले. त्यामुळे प्रशिक ससाने याने २ ऑगस्ट रोजी शहर पोलिस ठाण्यात तक्रार दिली. त्यावरून गुन्हा दाखल करण्यात आला आहे.
