भडगाव : प्रतिनिधी
भडगाव तालुक्यातील एका गावात १२ वर्षाच्या मुलाचा मृतदेह तर जवळचा वडिलांचा देखील गळफास घेतलेल्या अवस्थेत आढळून आल्याने खळबळजनक घटना सकाळी उघडकीस आली आहे. हि घटना भडगाव तालुक्यातील शिवणी या गावात घडली आहे. यात संजय साहेबराव चव्हाण (४८) आणि कौशिक संजय चव्हाण (१२) अशी मृत पिता-पुत्राची नावे आहेत. पिता-पुत्राच्या मृत्यूचे कारण समजू शकले नाही.
पोलिसांनी दिलेल्या माहितीनुसार, संजय हे निंबाच्या झाडाला गळफास घेतलेल्या अवस्थेत तर जवळच असलेल्या पत्र्याच्या शेडमध्ये त्यांचा मुलगा कौशिक हा बंगळीवर मृतावस्थेत आढळून आला. हा प्रकार कळताच ग्रामस्थ व नातेवाइकांनी त्यांना भडगाव ग्रामीण रुग्णालयात आणले. वैद्यकीय अधिकाऱ्यांनी पिता- पुत्रांना मृत घोषित केले. याबाबत भडगाव पोलिसात अकस्मात मृत्यूची नोंद करण्यात आली आहे.
