जळगाव : प्रतिनिधी
जळगाव तत्कालीन जिल्हाधिकारी अमन मित्तल यांच्या नावाने बनावट फेसबुक अकाऊंट तयार करीत या अकाऊंटवरून घरगुती साहित्य विक्री करावयाचे असल्याची पोस्टदेखील टाकण्यात आली आहे. या प्रकरणी अमन मित्तल यांनी दिलेल्या तक्रारीवरून जळगाव सायबर पोलीस ठाण्यात गुन्हा दाखल करण्यात आला आहे.
तत्कालीन जिल्हाधिकारी अमन मित्तल यांची गेल्याच आठवड्यात बदली झाली आहे. सायबर चोरट्यांनी अमन मित्तल यांच्या नावाने बनावट फेसबुक अकाऊंट तयार केले आहे. तसेच त्या अकाऊंटवरून घरगुती साहित्य विक्रीला द्यावयाचे सांगत, फसवणूक करण्याचा प्रयत्न करण्यात आला आहे. अमन मित्तल आयएएस या नावाने हे अकाऊंट तयार केले आहे. तसेच याच नावाने मित्तल यांचे अधिकृत अकाऊंटदेखील आहे. त्यांच्याच अकाऊंटवरील फोटो वापरून बनावट अकाऊंट तयार करण्यात आले. बनावट अकाऊंटवरून घरगुती साहित्य विक्री करण्यात येणार असल्याची पोस्ट टाकल्यानंतर ही पोस्ट व्हायरल झाली. त्यानंतर मित्रांनी याबाबत मित्तल यांना माहिती दिली. त्यानंतर त्यांनी ऑनलाईन पध्दतीने सायबर पोलीस ठाण्यात तक्रार नोंदविली. तसेच प्रकाराबाबत फोनवरून जळगाव जिल्ह्याचे पोलीस अधिक्षक एम. राजकुमार यांना कळविले. संबंधित बनावट फेसबुक खातं व त्यावरून फसवणूक संदर्भातील मॅसेजचे फोटो अमन मित्तल यांनी पोलीस अधिक्षकांना व्हॉट्सअॅपवरून पाठविले. मित्तल यांनी आपल्या अधिकृत अकाऊंटवरूनदेखील आपले बनावट अकाऊंट तयार करण्यात आल्याचे सांगितले आहे.
