जळगाव : प्रतिनिधी
गेल्या दोन महिन्यापूर्वी लग्न होवून आपल्या आई वडिलांपासून विभक्त होत संसार थाटलेल्या जितेश अनिल राठोड २५ वर्षीय तरूणाने जळगावात गळफास घेऊन आपली जीवन यात्रा संपवल्याची दुर्दैवी घटना गुरुवारी पहाटे उघडकीस आली आहे.
मिळालेल्या माहितीनुसार, साकळी येथील मुळचे रहिवासी असलेले सध्या शहरानजीक असलेल्या व्दारकानगरात अनिल रायसिंग राठोड हे आपल्या परिवारासह वास्तव्यास असून यात सगुनाबाई, मुलगा दिलीप आणि जितेश असे आहेत. ते हातमजूरी करून कुटुंबातील सदस्य उदरनिर्वाहास हातभार लावतात. जितेश याचे २२ मे २०२३ रोजी लग्न झाले होते. काही दिवसांनतर त्याने बिबानगरात पत्नीसोबत घर थाटले. रिक्षा चालवून तो प्रपंच चालवत होता. बुधवारी सायंकाळी तो घरी आला. घरात जितेश आणि त्याची पत्नी होती. रात्री साडेबारा वाजेच्या सुमारास त्याने टोकाचा निर्णय घेत गळफास घेतला. हा प्रकार लक्षात आल्यानंतर पत्नीने आरडाओरड केली. स्थानिक लोकांनी माहिती तालुका पोलिसांना दिली. पोलीस उपअधीक्षक आप्पासाहेब मोरे यांच्यासह कर्मचार्‍यांनी घटनास्थळी धाव घेतली. हा निरोप कळताच वडिल अनिल राठोड व कुटुंबातील अन्य सदस्यांनी बिबानगरात धाव घेतली. अत्यवस्थेत असलेल्या जितेश याला पोलिसांनी तत्काळ जिल्हा शासकीय रूग्णालयात नेले असता तपासणीअंती वैद्यकीय अधिकार्‍यांनी त्यास मृत घोषीत केले.
तरूणाचा मृत्यू झाल्याचे कळाल्यानंतर कुटुंबातील सदस्यांनी मोठा आक्रोश केला. जितेश याच्या आत्महत्येमागचे कारण समजू शकले नाही. या प्रकरणी जळगाव तालुका पोलिसांत अकस्मात मृत्यूची नोंद करण्यात आली असून प्राथमिक तपास पोलीस हेडकॉन्स्टेबल अनिल फेगडे हे करीत आहेत.
