धरणगाव : प्रतिनिधी
तालुक्यातील एका गावात जबरी घरफोडीची घटना उघडकीस आली आहे. तालुक्यातील एका गावात बंद घराचे कुलूप तोडून चोरट्यांनी 55 हजारांचा ऐवज लांबवल्याची घटना दि.१५ ते १७ जुलै दरम्यान घडली. या प्रकरणी अज्ञात चोरट्याविरोधात धरणगाव पोलिसात गुन्हा दाखल करण्यात आला.
पोलिसांनी दिलेल्या माहितीनुसार, धरणगाव तालुक्यातील पिंप्री खुर्द येथील रहिवासी रमेश सीताराम बडगुजर (वय ६३) हे मजुरी काम करून उदरनिर्वाह करतात. दि. १५ ते १७ दरम्यान ते गावाला गेल्याने घर बंद असल्याची संधी चोरट्यांनी साधली. चोरट्यांनी 30 हजार रुपये किंमतीचे कर्णफुल, पाच हजार रुपये किंमतीच्या साड्या व 18 हजारांची रोकड असा एकूण 55 हजारांचा ऐवज लांबवण्यात आला. हा प्रकार उघडकीस आल्यानंतर बडगुजर यांनी धरणगाव पोलिसात तक्रार दिल्यावरून गुन्हा दाखल करण्यात आला. तपास हवालदार राजू पाटील करीत आहेत.
