जामनेर : प्रतिनिधी
तालुक्यातील लहासर गावाजवळील सागवान जंगलातील नाल्यात सुमारे ४५ वर्षे वयोगटातील पुरुषाचा मृतदेह कुजलेल्या अवस्थेत सोमवारी दुपारी ३ वाजेच्या सुमारास आढळून आला. या घटनेने एकच खळबळ उडाली आहे.
याप्रकरणी माहिती मिळताच पोलिसांनी घटनास्थळी धाव घेत पाहणी केली. पोत्यात मृतदेह कुजलेल्या स्थितीत आढळून आला. मृताच्या तोंडावर प्लॅस्टीक गुंडाळले होते. तसेच हात व पाय बांधलेले होते. जांभुळ येथील एक इसम तीन महिन्यापूर्वी बेपत्ता झाला होता. त्याच्या मारेकऱ्यास पहूर पोलिसांनी अटक केली होती, मात्र मृतदेहाची कुठे विल्हेवाट लावली याबाबत त्याचेकडून कोणतीच माहिती मिळत नव्हती. या अनुषंगाने पहूर पोलिस निरीक्षक सचिन सानप यांनी घटनास्थळी पाहणी केली. अपर पोलिस अधीक्षक रमेश चोपडे, पोलिस निरीक्षक किरण शिंदे, एलसीबीचे निरीक्षक नजन पाटील यांचेसह फॉरेंसीक टीमने पाहणी केली. मृतदेह कुणाचा व त्याच्या हत्येमागील उद्देशाबाबत उकल करण्याचे आव्हान पोलिसांपुढे आहे.
