मुंबई : वृत्तसंस्था
भाजप व शिवसेनेसोबत जावून राष्ट्रवादी काँग्रेसचे बंडखोर आमदार सोमवारी उपमुख्यमंत्री अजित पवार यांच्या नेतृत्वात पक्षाध्यक्ष शरद पवार यांची घेण्यासाठी यशवंतराव चव्हाण सेंटरमध्ये पोहोचलेत. उपमुख्यमंत्री अजित पवार यांच्यासह छगन भुजबळ, दिलीप वळसे पाटील, हसन मुश्रीफ आदी मंत्र्यांनी रविवारीच पवारांची भेट घेतली होती. त्यानंतर सलग दुसऱ्या दिवशी अजित पवारांच्या गोटातील आमदार शरद पवारांची भेट घेणार आहेत.
शरद पवार वाय बी सेंटरमध्ये उपस्थित नाहीत. ते थोड्याच वेळात तिथे पोहोचतील. विधिमंडळाचे पावसाळी अधिवेशन, राष्ट्रवादी काँग्रेसच्या दोन्ही गटांनी एकमेकांना बजावलेले व्हीप तथा विरोधी पक्षांच्या बंगळुरूतील बैठकीच्या पार्श्वभूमीवर या भेटीगाठी होत असल्यामुळे राज्याच्या राजकारणात मोठी खळबळ माजली आहे.
उपमुख्यमंत्री अजित पवार यांनी रविवारी आपल्या समर्थक 9 मंत्र्यांसह शरद पवार यांची बाय बी चव्हाण सेंटरला जावून भेट घेतली. त्यात या नेत्यांनी त्यांच्याकडे भाजपसोबत येण्याचा आग्रह धरला. पण पवारांनी त्यांच्या प्रस्तावावर कोणतीही प्रतिक्रिया दिली नाही. परिणामी, अजित पवार गटाच्या नेत्यांनी ही बैठक आटोपती घेतली. या भेटीवर राजकीय वर्तुळातून विविध प्रतिक्रिया उमटत असताना सोमवारी पुन्हा अजित पवार आपल्या आमदारांसह शरद पवारांच्या भेटीला पोहोचलेत.
