लाईव्ह महाराष्ट्र न्यूज: आकाशवाणी चौकातील राष्ट्रवादी पक्ष कार्यालयासमोर शुक्रवार ५ नोव्हेंबर रोजी दुपारी १२ वाजता राष्ट्रवादी युवती काँग्रेसतर्फे पंतप्रधान नरेंद्र मोदी यांना भाऊबजीचे औक्षण करून इंधनदरवाढीचा निषेध करण्यात आला.
याबाबत माहिती अशी की, पेट्रोल, डिझेल आणि गॅस दरवाढीविरोधात खासदार सुप्रिया सुळे यांच्याच्या आदेशानुसार युवती प्रदेश अध्यक्ष सक्षणा सलगर यांच्या मार्गदर्शनाखाली राष्ट्रवादी युवती काँग्रेस व महानगर यांच्या वतीने शुक्रवार ५ नोव्हेंबर रोजी दुपारी १२ वाजता आकाशवाणी चौकातील राष्ट्रवादी काँग्रेस पक्ष कार्यालयासमोर केंद्र सरकारने गॅस सिलिंडरच्या केलेल्या भरमसाठ दरवाढीचा निषेध नोंदविण्यात आला. सर्वसामान्यांचे जगणे सोपे करण्याची गरज असताना केंद्र सरकार मात्र सतत भाववाढ करून सर्वसामान्य जनतेला वेठीस धरत आहे,म्हणून पंतप्रधान नरेंद्र मोदी यांच्या फोटोला ओवाळून प्रतिकात्मक भाऊबीज साजरी करून मोदीजीनी जनतेला गरजेच्या जीवनावश्यक वस्तू स्वस्त करून समस्त महिला भगिनींना भाऊबीजेची भेट द्यावी यासाठी हे आंदोलन करण्यात आले.
यावेळी जळगाव महानगराध्यक्ष अध्यक्ष अशोक लाडवंजारी, राष्ट्रवादी युवती उत्तर महाराष्ट्र समन्व्यक दिव्या भोसले, युवती जिल्हाध्यक्ष कल्पिता पाटील, शहराध्यक्ष आरोही नेवे, ग्रामीण कार्याध्यक्ष कोमल पाटील, ग्रामीण उपाध्यक्ष दीपिका भामरे,स्नेहल शिरसाठ आदी युवती उपस्थित होत्या.
