जळगाव : प्रतिनिधी
शहरातील पिंप्राळा परिसरातील एका परिसरात घरासमोर बसलेल्यांना हटकल्यावरून तिघांनी नीलेश लक्ष्मीनारायण दुबे (वय ४१) यांच्यावर धारदार शस्त्राने वार करीत त्यांचा १५ हजार रुपये किमतीचा मोबाइल घेऊन पोबारा केला. ही घटना १ जुलै रोजी रात्री साडेनऊ वाजता घडली. याप्रकरणी २ जुलै रोजी अज्ञात तीन जणांविरुद्ध रामानंदनगर पोलिस ठाण्यात गुन्हा दाखल करण्यात आला.
पोलिसांनी दिलेल्या माहितीनुसार, १ जुलै रोजी रात्री दुबे यांच्या घरासमोर वाळूच्या ढिगावर तीन जण बसलेले होते. त्यांना दुबे यांनी ‘येथे का बसले आहे?’ असे विचारले असताना तिघांनी तू कोण असा उलट सवाल केला. मी येथेच राहत असल्याचे सांगत दुबे घरात निघून गेले. बसलेल्या तिघांपैकी एकाने दुबे यांना पुन्हा बाहेर बोलवून तू आम्हाला का विचारणा केली, असे म्हणत मारहाण करण्यास सुरुवात केली. त्यातील एकाने धारदार शस्त्राने मांडीवर दुखापत करीत फिर्यादीच्या शर्टाच्या खिशातून १५ हजार रुपये किमतीचा मोबाइल हिसकावून दुचाकीवरून पळून गेले. याप्रकरणी दुबे यांनी रामानंद नगर पोलिस ठाण्यात दिलेल्या फिर्यादीवरून तीन जणांविरुद्ध गुन्हा दाखल करण्यात आला आहे. पुढील तपास पोलिस उपनिरीक्षक प्रदीप बोरुडे करीत आहेत.
