जळगाव : प्रतिनिधी
शहरातील एका कार्यालयात आमच्या देवाची प्रार्थना केल्यास आजार बरे होत असल्याचे सांगत, त्यांना प्रार्थनेसह सत्संगाच्या नावाखाली एकत्रित करून त्यांचे धर्मपरिवर्तन करीत असल्याचा संशयावरून शहरातील कालिंका माता चौक परिसरात गोंधळ झाला. रविवारी या प्रकाराचा विश्व हिंदू परिषदेच्या कार्यकर्त्यानी पर्दाफाश केला आहे. या प्रकरणी तीन पुरुष व एक महिलेवर गुन्हा दाखल करण्यात आला आहे.
मिळालेल्या माहितीनुसार, शहरातील कालिंका माता चौक परिसरातील एका लॉन्सच्या हॉलमध्ये ग्रामीण भागातील काही समुदायांतील कुटुंबांना प्रार्थनेच्या नावाखाली एकत्र आणले होते. आमच्या देवाची प्रार्थना केल्यास तुम्हाला असलेले आजार बरे होत असून तुम्हाला दुसऱ्या कुठल्याच देवाची प्रार्थना करण्याची गरज राहणार नसल्याचे त्यांना सांगितले. त्यानुसार हे कुटुंब सकाळपासून प्रार्थनेला उपस्थित झाले होते. या प्रकाराची माहिती विहिंपच्या कार्यकर्त्यांनी एमआयडीसी पोलिसांना माहिती दिली. त्यानुसार उपविभागीय पोलिस अधिकारी संदीप गावित, पोलिस निरीक्षक जयपाल हिरे हे कर्मचाऱ्यांसह घटनास्थळी दाखल झाले. कीर्तनकार योगेश दिलीप कोळी यांच्या फिर्यादीवरून सीमा संतोष पाटील (वय ४१), पवन सारसर (२५), राजकुमार हरिशंकर यादव (४७), प्रदीप भालेराव (४९) यांच्याविरोधात गुन्हा दाखल झाला आहे.
