मुंबई : वृत्तसंस्था
राज्याच्या राजकारणात पुन्हा भूकंप होण्याची तयारीत असून आता थेट विरोधी पक्षनेते अजित पवार आपल्या काही समर्थक आमदारांसह राजभवनाकडे रवाना झाले आहेत. मुख्यमंत्री एकनाथ शिंदे, उपमुख्यमंत्री देवेंद्र फडणवीस हेदेखील राजभवनाकडे रवाना झाले आहेत. अजित पवार आज शिंदे सरकारमध्ये सामील होणार असून मंत्रिपदाची शपथ घेणार असल्याची शक्यता वर्तवली जात आहे. अजित पवार यांच्याबरोबर राष्ट्रवादीचे छगन भुजबळ आणि इतर आमदारही मंत्रिपदाची शपथ घेण्याची शक्यता आहे.
महत्त्वाचे म्हणजे मंत्रिमंडळ विस्तार होणार असेल तर आमची संपूर्ण तयारी झाली आहे, अशी महत्त्वाची माहिती राजभवनाकडून देण्यात आली आहे. त्यामुळे आज संध्याकाळपर्यंत राष्ट्रवादीच्या नेत्यांची शपथविधी होण्याच्या शक्यतांच्या चर्चांना उत आला आहे.
आज दुपारी दोन वाजता मंत्रिमंडळाचा विस्तार होणार असून त्यात मुख्यमंत्री म्हणून अजित पवार यांचा शपथविधी होण्याची शक्यता व्यक्त होत आहे. दरम्यान, अजित पवार यांनी बोलावलेल्या बैठकीला राष्ट्रवादी काँग्रेसचे आमदारही मोठ्या संख्येने उपस्थित होते. या बैठकीला दिलीप वळसे पाटील, हसन मुश्रीफ, छगन भुजबळ, किरण लहमाटे, नीलेश लंके, धनंजय मुंडे, रामराजे निंबाळकर, दौलत दरोडा, मकरंद पाटील अतुल बेनके, सुनील टिंगरे, अमोल मिटकरी, अदिती तटकरे, शेखर निकम, निलय नाईक, अशोक पवार, अनिल पाटील, सरोज अहिरे आदी उपस्थित होते. राष्ट्रवादीचे हे सर्व नेते सरकारमध्ये सामील होणार असल्याचे बोलले जात आहे.
