जळगाव : प्रतिनिधी
राज्यात बंदी असलेल्या गुटख्याची तस्करी नेहमीच मध्यप्रदेशातून मोठ्या प्रमाणात करण्यात येते या संदर्भात वारंवार कारवाई होऊनही तस्करी थांबण्याचे नाव घेत नाही.आज वाहनातून तब्बल १८ लाख रूपयांचा गुटखा जप्त करण्यात आल्याची कारवाई अन्न व औषध प्रशासनातर्फे करण्यात आली आहे.
मिळालेल्या माहितीनुसार, मध्यप्रदेशच्या सीमेला लागून असल्यामुळे मुक्ताईनगर येथून मोठ्या प्रमाणात अवैध गुटख्याची तस्करी होत असते. अलीकडच्या काही महिन्यांचा विचार केला असता, बऱ्याचदा या प्रकारे गुटख्यांची वाहतूक करणाऱ्या वाहनांना जप्त करण्यात आले आहे. आज सकाळी अशाच प्रकारची कारवाई मध्यप्रदेश आणि महाराष्ट्राच्या सीमेवरील चेक पोस्टजवळ करण्यात आली आहे.
मध्यप्रदेशातून एम.एच.१९ बी.एम.२३८४ या क्रमांकाच्या महेंद्रा बोलेरो पीकअप वाहनातून अवैध गुटखा विक्रीसाठी आणला जात असल्याची तक्रार नाशिक येथील गुप्तचर खात्याकडे करण्यात आली होती.या अनुषंगाने चेक पोस्टवर सापळा रचून सदर वाहन थांबविण्यात आले.यात तपासणी केली असता १८ लाख रूपयांचा विमल या ब्रँडचा गुटखा आढळून आला. या प्रकरणी गुटखा आणि वाहन मिळून एकूण २२ लाख रूपयांचा ऐवज जप्त करण्यात आला आहे. या कारवाईमुळे पुन्हा एकदा सीमेवर असलेल्या चेक पोस्ट प्रशासनाच्या भोंगळ कारभाराची पुन्हा एकदा प्रचिती आली आहे.
