छत्रपती संभाजी नगर : वृत्तसंस्था
राज्यातील छत्रपती संभाजी नगरातून एक धक्का देणारी बातमी समोर आली आहे. शहरातील शिवशंकर कॉलनीतील जिजामाता बालक आश्रमातील एका अडीच महिन्यांच्या बालकाची कॅनॉटमधील व्यापाऱ्याला तब्बल पाच लाखांना विक्री करणाऱ्यांचा पर्दाफाश दामिनी पथकाने केला. मंगळवारी सकाळी ११ च्या सुमारास पोलिसांनी ही कारवाई केली. दिलीप श्रीहरी राऊत (५२, रा. तानाजी चौक, शिवशंकर कॉलनी) व त्याची पत्नी सविता दिलीप राऊत यांना पोलिसांनी ताब्यात घेतले असून अाश्रमावर बंदी घातली अाहे.
भरोसा सेलच्या पोलिस निरीक्षक आम्रपाली तायडे यांच्या पथकाला खबऱ्याकडून शिवशंकर कॉलनीतील जिजामाता अनाथाश्रमाचा संस्थाचालक एका अडीच महिन्यांच्या बाळाची विक्री करणार असल्याची माहिती मिळाली हाेती. त्यावरून दामिनी पथकाच्या निरीक्षक अनिता फसाटे व त्यांच्या पथकाने जिजामाता बालक आश्रमाची झडती घेतली. तेव्हा एका खोलीत साडीच्या झोळीत अडीच महिन्यांचा मुलगा झोपलेल्या स्थितीत आढळून आला. पोलिसांनी आश्रमचालक राऊतची चौकशी केली असता त्याने उडवाउडवीची उत्तरे देण्यास सुरुवात केली. पोलिसांनी खाक्या दाखवताच त्याने कबुली दिली. याप्रकरणी जवाहरनगर पोलिस ठाण्यात गुन्हा दाखल करण्यात आला आहे. दरम्यान दिलीप राऊतने पोलिसांना हे बाळ आमच्या पैठण येथील नातेवाईक महिलेचे असून त्या आजारी असल्याने बाळ येथे ठेवल्याचे सांगितले. मात्र, त्याचा पुरावा दिला नाही. त्यामुळे पोलिस अाता बाळाच्या जन्मदात्रीचा शोध घेत अाहे. दोन आश्रमांनाच दत्तक देण्याची परवानगी : पोलिस निरीक्षक अनिता फसाटे यांनी दिलेल्या माहितीनुसार, महिला व बालकल्याण विभागाच्या वतीने भारतीय समाज केंद्र व साकार या दोन संस्थांनाच मूल दत्तक देण्याचा अधिकार आहे.
