जळगाव : प्रतिनिधी
शहरातील समता नगर परिसरात एका घरात मुलगा बाहेर ओट्यावर बसला असताना, पित्याने घरातील बाथरूममध्ये दोरीने गळफास घेऊन आत्महत्या केल्याची घटना गुरुवारी घडली आहे. याप्रकरणी रामानंदनगर पोलिस ठाण्यात अकस्मात मृत्यूची नोंद करण्यात आली आहे. शिवाजी रामकृष्ण निकम (वय ५८, रा. समता नगर) असे मृत प्रौढाचे नाव आहे.
मिळालेल्या माहितीनुसार, शहरातील समता नगर परिसरातील शिवाजी निकम हे पत्नी व मुलासह वास्तव्याला होते. सेंट्रिंगचे काम करून आपला उदरनिर्वाह करत होते. गुरुवारी सकाळी ९ वाजेच्या सुमारास पत्नी ज्योती निकम या कामावर निघून गेल्या. दुपारी शिवाजी निकम हे मुलगा राजेंद्र सोबत घरी होते. दुपारी ३ वाजेच्या सुमारास मुलगा हा घराबाहेर बसलेला असताना शिवाजी निकम यांनी राहत्या घरातील बाथरूममध्ये दोरीच्या साहाय्याने गळफास घेऊन आत्महत्या केली. आत्महत्येचे कारण अद्याप समजू शकलेले नसून याप्रकरणी रामानंदनगर पोलिस ठाण्यात अकस्मात मृत्यूची नोंद करण्यात आली आहे.
