भडगाव : प्रतिनिधी
चाळीसगाव रोडवरील साई ऑटो सेंटर येथून ३० नव्या दुचाकी चोरीस गेल्याची घटना घडली आहे. ही घटना शोरुममधील स्टॉक रजिस्टर तपासल्यानंतर उघडकीस आली असून एकूण २३ लाख रुपये किंमतीच्या मोटारसायकल चोरी झालेल्या आहेत. याबाबत भडगाव पोलिस स्टेशनला अज्ञात आरोपीविरुद्ध गुन्हा दाखल करण्यात आला आहे.
ऑटो सेंटरचे संचालक रावसाहेब केशव पाटील (भडगाव) यांनी दिलेल्या फिर्यादीनुसार, नेहमीप्रमाणे दररोज सकाळी १० वाजता शोरुमला जावून कामावर देखरेख तसेच दुचाकी वाहनांच्या विक्रीबाबत तपशिलाची माहिती घेतली जाते. दि. ११ जून रोजी दुपारी ३ वाजेनंतर शोरुमचे व्यवस्थापक महेश लोटन पाटील तसेच रविकांत पाटील यांनी शोरुममधील दुचाकी वाहनांच्या स्टॉकची पडताळणी केली असता काही दुचाकी कमी असल्याचे आढळून आले. अधिक तपासणी केली असता ३० दुचाकी कमी असल्याचे दिसून आले. अज्ञाताविरूध्द भा. दं. वि कलम ३८०प्रमाणे अज्ञात आरोपीविरुद्ध चोरीचा गुन्हा दाखल करण्यात आला आहे. तपास पोलीस निरीक्षक राजेंद्र पाटील यांच्या मार्गदर्शनाखाली पोहेकॉ. नितीन रावते, पोहेकॉ विलास पाटील, पोहेकॉ. विजय जाधव, पोलीस कान्स्टेबल स्वप्नील चव्हाण हे करीत आहेत.
