अमळनेर : प्रतिनिधी
तालुक्यातील मारवाड गावातील ग्रामपंचायतीच्या व्यापारी संकुलातील भाडे तत्वावरील शिव जनरल अॅण्ड किराणा दुकानाला रविवारी पहाटे तीन वाजेच्या सुमारास आग लागल्याने सुमारे सात लाखांहून अधिक नुकसान झाले. पहाटेच्या सुमारास लागलेल्या आगीनंतर आग विझवण्यासाठी ग्रामस्थांनी मोठी धावपळ उडाली.
मिळालेल्या माहितीनुसार, मारवाड गावातील रहिवासी राजेंद्र भगवान पाटील यांचे मारवड ग्रामपंचायतीने बांधलेल्या व्यापारी संकुलात शिव जनरल स्टोअर्स अॅण्ड किराणा नावाचे दुकान आहे. दुकानाचे मालक राजेंद्र पाटील हे रात्री लघूशंकेला उठले असता आपल्या दुकानाचे दिशेने मोठा धूर निघताना दिसल्यानंतर त्यांनी आरडा-ओरड केल्यानंतर स्थानिक ग्रामस्थ जमा झाले. किराणा दुकानाचे शटर उघडल्यानंतर मोठ्या प्रमाणावर आग पसरल्याचे दिसून आल्यानंतर दुकानातील बादलीने पाणी टाकुन आग विजवण्याचा प्रयत्न करण्यात आला मात्र आगीचा विळखा मोठ्या प्रमाणावर असल्याने अमळनेर अग्निशमन दलाला पाचारण करण्यात आले मात्र तो पर्यंत दुकानासह त्यातील सामान जळून खाक झाले. पोलीस उपनिरीक्षक विनोद पाटील, हवालदार अगोणे, तलाठी भावसार, सरपंच, उपसरपंच व ग्रामस्थांनी धाव घेतली.
