चोपडा : प्रतिनिधी
जळगाव जिल्ह्यात गेल्या काही दिवसापासून नेहमी चर्चेचा विषय असलेल्या वाळूमाफियांनी पुन्हा एकदा पायी जाणाऱ्या तरुणाचा बळी घेतल्याची घटना घडली आहे. हि घटना चोपडा तालुक्यात घडली आहे.
मिळालेल्या माहितीनुसार, वाळूने भरलेल्या भरधाव ट्रॅक्टरने पायी चालणार्‍या ३० वर्षीय तरुणास धडक दिल्याने तरुणाचा मृत्यू ओढवला. हा अपघात रविवारी सकाळी 11 च्या सुमारास अडावद कृषी विद्यालयाजवळ घडला. या अपघातात चोपडा तालुक्यातील कमळगाव येथील राजेंद्र झिंगा धनगर या तरुणाचा मृत्यू ओढवला. रााजेंद हा तरुण अडावद-चोपडा मार्गावरील कृषी विद्यालयाजवळ पायी चालत असताना वाळूच्या भरधाव ट्रॅक्टरने राजेंद्र यास जबर धडक दिली. यात त्याच्या डोक्याला मार लागल्याने त्याचा मृत्यू झाला. याप्रकरणी ट्रॅक्टरचालक रवींद्र विजय कोळी (29, रा. सुटकार ता. चोपडा) यास वाहनासह पोलिसांनी ताब्यात घेतले आहे. मृत राजेंद्र धनगर याच्या पश्चात आई, वडील, पत्नी, मुलगा, मुलगी असा परीवार आहे.
