चोपडा : प्रतिनिधी
तालुक्यातील अडावद येथे आठवडी बाजाराच्या परिसरात सुरू असलेल्या सुलभ शौचालयाचे बांधकाम करत असताना 33 वर्षीय मजुराला मुख्य वाहिनीचा धक्का बसल्याने बांधकाम करणाऱ्या मजुराचा मृत्यू झाला.
मिळालेल्या माहितीनुसार, ग्रामपंचायतीच्या माध्यमातून आठवडी बाजाराच्या परिसरात सुलभ शौचालयाचे बांधकाम सुरू आहे. शौचालयाच्या वरूनच उच्च लघुदाब विद्युत वाहिनी गेली आहे. अशातच दि. ८ रोजी दोघे जण या शौचालयाचे बांधकाम करीत होते. दुपारी २ वाजेच्या सुमारास रहेमान गफ्फार मन्यार (33, अमळगाव, ता. अमळनेर, ह. मु. अडावद, ता. चोपडा) या मजुराचा विजेचा जबर धक्का बसल्याने मृत्यू झाला. त्याच्या पश्चात आई, पत्नी, मुलगा, मुलगी असा परिवार आहे. घरातील कर्ता गेल्याने या परिवारावर दुःखाचा डोंगर कोसळला आहे. चोपडा उपजिल्हा रुग्णालयात त्याचे शवविच्छेदन करण्यात येऊन रात्री उशिरा त्याच्यावर अडावद येथेच अंत्यसंस्कार करण्यात आले.
