अमळनेर : प्रतिनिधी
हरवलेल्या किसान कार्डचा वापर करून अज्ञात आरोपीने बँकेच्या एटीएममधून ५१,७०० रुपये पैसे काढले आहे. ही घटना २६ ते २९ मे दरम्यान घडली.
मिळालेल्या माहितीनुसार, अमळनेर शहरातील पैलाड येथील सविता प्रल्हाद पाटील यांचे जिल्हा बँकेच्या जानवे शाखेचे किसान क्रेडिट कार्ड आहे. त्यांनी कार्डवरच पीन कोड लिहला होता. हे कार्ड दि. २६ रोजी हरवले.त्यांनंतर दि. 30 रोजी त्या बँकेत कार्ड बंद करून पैसे काढायला गेल्या. त्यावेळी बँकेकडून त्यांना ५१ हजार ७०० रुपये काढले गेल्याचे सांगण्यात आले. हे पैसे एका खासगी बँकेच्या एटीएमवरून काढले गेले. ही रक्कम लांबवल्याचे लक्षात येताच पाटील यांनी अमळनेर पोलिसात फिर्याद दिली. अज्ञात चोरट्याविरोधात गुन्हा दाखल करण्यात आला आहे. तपास हे.कॉ. सुनिल हटकर करत आहेत
