जळगाव : प्रतिनिधी
शिरसोली ते जळगाव दरम्यान धावत्या रेल्वेचा धक्का लागून हनुमाननगरातील व्यक्तीचा जागीच मृत्यू झाल्याची घटना बुधवारी रात्री ८ वाजेच्या सुमारास घडली आहे. राजू किसन पवार (वय ४०, रा. चितोड, जि.धुळे ह.मु. हनुमाननगर) असे मृत व्यक्तीचे नाव असून, याप्रकरणी रामानंदनगर पोलिसात अकस्मात मृत्यूची नोंद करण्यात आली आहे.
मिळालेल्या माहितीनुसार, वाघनगर हनुमाननगरात परिसरातील राजू पवार हे पत्नी व मुलासह वास्तव्याला होते. ते सेंट्रिंगचे काम करून कुटुंबाचा उदरनिर्वाह करीत होते. बुधवारी रात्री पिंप्राळा येथील काम आटोपून ते घरी येण्यासाठी निघाले होते. शिरसोली ते जळगाव दरम्यानच्या रेल्वे खांबा (क्रमांक ४१५- २५ ते २७) च्या दरम्यान रेल्वेरूळ क्रॉस करत असताना धावत्या रेल्वेचा धक्का लागल्याने त्यांच्या डोक्याला गंभीर दुखापत झाली. त्यात त्यांचा जागीच मृत्यू झाला. या घटनेची माहिती मिळाल्यानंतर रामानंदनगर पोलिस ठाण्याचे पोलीस नाईक हर्षल पाटील यांनी घटनास्थळी धाव घेऊन मृतदेहाचा पंचनामा केला. नंतर मृतदेह जिल्हा रुग्णालयात हलविण्यात आला. रात्री उशिरा रामानंदनगर पोलिसात अकस्मात मृत्यूची नोंद करण्यात आली. गुरुवारी सकाळी १० वाजता शवविच्छेदन करण्यात येऊन मृतदेह नातेवाइकांच्या ताब्यात देण्यात आला. मयताच्या पश्चात पत्नी मीनाबाई, मुलगा सुनील, एक भाऊ आणि दोन विवाहित बहिणी असा परिवार आहे. पुढील तपास पोलिस नाईक हर्षल पाटील करीत आहेत.
