पाचोरा : प्रतिनिधी
पाचोरा तालुक्यातील एका गावात अवैधरीत्या वाळू वाहतूक करणार्‍या ट्रॅक्टरचे टायर फुटल्यानंतर झालेल्या या अपघातात एका तरुणाचा दुर्देवी मृत्यू झाल्याची घटना घडली आहे.
मिळालेल्या माहितीनुसार, पाचोरा तालुक्यात शनिवारी पहाटे तीन वाजेच्या दरम्यान भडगाव रोडवरील हॉटेल स्वप्नशिल्प समोर अवैध वाळू वाहतूक करणारे ट्रॅक्टरचे टायर फुटल्याने वाहन थेट महामार्गावरील खांबावर आदळल्याने ट्रॅक्टर पलटी झाले. या अपघातात ट्रॅक्टरवरील चालक पवन हिंमत पाटील (२०) याचा दुर्देवी मृत्यू झाला आहे. ग्रामीण रुग्णालयाचे वैद्यकीय अधीक्षक डॉ. अमित साळुंखे यांनी तरुणास मृत घोषित करून मृतदेहाचे शवविच्छेदन करून नातेवाईकांच्या ताब्यात मृतदेह सोपवला.
या अपघातात पवन हिंमत पाटील यांच्या डोक्याला व चेहर्‍याला जबरी मार लागल्याने त्याचा जागीच मृत्यू झाला. अपघातानंतर तत्काळ तुटलेला खांब व वाळू दुसर्‍या वाहनात भरुन पुरावा नष्ट करण्याचा प्रयत्न झाल्याचा आरोप आहे. मयत चालक पवन हा आई वडीलास एकुलता एक मुलगा होता. पवन याच्या पश्चात बहिण व वृद्ध आई, वडील असा परीवार आहे.
