मुंबई : वृत्तसंस्था
राज्यात पुन्हा एकदा राष्ट्रवादी व भाजपच्या नेत्यामध्ये वाक्ययुद्ध रंगले आहे. या वाक्ययुद्धात राष्ट्रवादीचे जितेंद्र आव्हाड तर भाजप महिला नेत्या चित्रा वाघ आघाडीवर आहेत. यावेळी थेट भाजप नेत्या चित्रा वाघ यांनी थेट आ.जितेद्र आव्हाड यांच्यावर टीका केली आहे.
जितेंद्र आव्हाडांचा मेंदू सडका आणि कुजका आहे. वोट बँकेसाठी लव्ह जिहादचे निर्लज्ज समर्थन करणारे औरंगजेबाची वंशावळ चालवत आहेत, अशी टीका वाघ यांनी केली आहे.
लव्ह जिहादविरोधी हिंदू जनजागरण सभा घेणाऱ्या निरंजन डावखरे ह्यांनी एका मुस्लीम भगिनीशी विवाह केला आहे. हे सामंजस्य वाढीला लागावे हीच इच्छा, असे खोचक ट्विट जितेंद्र आव्हाड यांनी केले होते. त्याला चित्रा वाघ यांनी हे उत्तर दिले आहे. अॅड. निरंजन डावखरेंनी एका हिंदू जनजागरण धर्मसभेचे आयोजन केले आहे. लव्ह जिहाद धर्मांतर आणि लँड जिहादविरोधी कायदा देशभर लागू करावा, यासाठी 30 एप्रिल रोजी ही धर्मसभा होत आहे. या सभेचे ठाण्यात पोस्टर्स लागलेत. त्यावरून जितेंद्र आव्हाड यांनी खोचक ट्विट करत त्यात निरंजन डावखरे यांनी एका मुस्लीम तरुणीशी विवाह केल्याचा उल्लेख केला होता. त्यालाच चित्रा वाघ यांनी प्रत्युत्तर दिले आहे.
आपल्या ट्विटमध्ये चित्रा वाघ म्हणतात की, निरंजन डावखरे यांच्या वैयक्तिक आयुष्यात डोकावणाऱ्या जितेंद्र आव्हाड यांचा मेंदू किती सडका आणि कुजका आहे हे दिसतेय. वोट बॅंकच्या तुकड्यासाठी ‘लव्ह जिहाद’चे निर्लज्जपणे समर्थन करणारेच खऱ्या अर्थाने औरंगजेबाची वंशावळ चालवताहेत. सब का हिसाब होगा!, असा इशाराही त्यांनी दिला आहे.
